Plantun de Prouvènço

Pèr coumpara dos planto d'encò nostre

Salix retusa & Schistidium crassipilum

Salix retusa

Salicaceae

Nom en français : Saule à feuilles émoussées.

Descripcioun :
Lou sause-di-fueio-esmoutado es un di quatre sause nanet que trachisson dins lis Aup prouvençalo. Aquéu reballo au sòu entre li roco e dins la pelouso. Se recounèis majamen bonodi si fueio de 8 à 30 mm que lou bout es souvènt esmoutu o, s'amas miés, moutu. Li fru peréu se recounèisson eisa que dounon d'èr à de pichòti pero jauno.

Usanço :
Tóuti li rusco de sause caupon de salicino que douno d'acide salicilì dins lou cors, ço qu'ajudo à abeissa li fèbre.

Port : Pichoto planto lignouso
Taio : 2 à 10 cm
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Salix
Famiho : Salicaceae

Ordre : Malpighiales

Coulour de la flour : Jauno
Petalo : ges
Ø (o loungour) enflourejado : 4 à 15 mm
Flourido : Printèms - Estiéu

Sòu : Ca
Autour basso e auto : 1600 à 2800 m
Aparado : Noun
Jun à avoust

Liò : Coumbo à nèu - Pelouso - Roucaio umido
Estànci : Subaupen à Aupen
Couroulougi : Ouroufito-Sud-Éuropo
Ref. sc. : Salix retusa L., 1759

Grimìo-de-la-pouncho-espesso

Schistidium crassipilum

Grimmiaceae

Nom en français : Grimmie à pointe épaisse.

Descripcioun :
La grimìo-de-la-pouncho-espesso dóu gènre Schistidium trachis en couissin pu o mens sarra e de coulour bruno à óulivo sus li roco cauquiero. Douno de ramo irreguliero que podon faire fin qu'à 5 cm d'aut. De proumié abord se recounèis à sis urno aurenjo 'mé uno couifo pounchudo roujo un pau espesso e peréu à si fueio en lanço verd-óulivo generalamen acabado pèr un pouncho ialino. Li dènt dóu peristome soun drecho e acabado pèr un pouncho bruno. La sedo jauno à aurenjo èi courteto (0,5 mm).

Usanço :
S'atrovo au nostre d'àutri meno dóu gènre Schistidium que ié sèmblo proun coume S. elegantulum, S. robustum, S. singarense nouma group Schistidium apocarpum.